![](https://www.hellochitwanonline.com/wp-content/uploads/2024/08/WhatsApp-Image-2024-07-26-at-14.54.58_adbbdc7d.jpg)
भरतपुर चितवन । चितवन जिल्ला कोरोना भाइरसको ‘हटस्पट’ बनेको छ । पछिल्लो समय यहाँ सङ्क्रमितको संख्या दिनहुँ ५० जनाको हाराहारीमा बढिरहेको छ । स्वास्थ्य कार्यालयले उच्च सङ्क्रमित १२ जिल्लाभित्र चितवनलाई पनि राखेको छ ।
स्वास्थ्य कार्यालय चितवनका अनुसार हालसम्म चितवन जिल्लामा उपचाररत रहेका २० कोरोना सङ्क्रमितको मृत्यु भइसकेको छ, जसमा चितवन जिल्लाका ११ जना स्थायी बासिन्दा रहेका छन् । चितवनमा सङ्क्रमितको संख्या र मृत्यु हुने संख्या भरतपुर महानगरमा बढी छ ।
‘चितवनमा सङ्क्रमित र मृत्यु हुनेको संख्या बढिरहेको छ, सरकारले पनि यस जिल्लालाई उच्च सङ्क्रमित हुने जिल्लाभित्र राखेको छ’, स्वास्थ्य कार्यालय प्रमुख दीपक तिवारीले भने, ‘बिहीबार साँझसम्म जिल्लामा सङ्क्रमितको संख्या ८५९ पुगेको छ ।’ उनका अनुसार सक्रिय सङ्क्रमितको संख्या ६०० को हाराहारीमा रहेको छ ।
बिहीबारै चितवन मेडिकल कलेजमा दुई सङ्क्रमितको मृत्यु भएको छ । अस्पतालका निर्देशक डा. दयाराम लम्सालका अनुसार गैँडाकोट नगरपालिका–२ का ३७ वर्षीय सङ्क्रमित पुरूष र भरतपुर महानगरपालिका–११ निवासी ४० वर्षीया सङ्क्रमित महिलाको मृत्यु भएको हो । अस्पतालले दिएको जानकारीअनुसार सङ्क्रमित महिलामा झाडापखाला, खोकी र सोडियमको मात्रा कम थियो । उनलाई उपचार गर्न भदौ ५ गते चितवन मेडिकल कलेजमा पु¥याइएको थियो । उनको भदौ १० गते कोरोना रिपोर्ट पोजेटिभ आएको थियो । महिलालाई आइसियू, भेन्टिलेटरमा राखेर उपचार गर्दैगर्दा मृत्यु भएको अस्पतालको भनाइ छ ।
मृत्यु भएका अर्का पुरूषमा अल्कोहलिक हेपाटाइटिस र एक्यिुड किड्नी डिजिजको समस्या थियो । उनी भदौ ९ गते अस्पतालमा भर्ना भएका थिए । भदौ १० गते कोरोना पुष्टि भएको थियो ।
यस्तै, राप्ती ९ की ३५ वर्षकी कोरोना सङ्कमित महिलाको बिहीबार साँझ भरतपुर अस्पतालमा मृत्यु भएको छ । तीन महिनादेखि डायलासिस भइरहेको ती महिलामा कोरोना संक्रमण पुष्टिपछि भरतपुर अस्पतालमा भेन्टिलेटरमा राखेर उपचार गरिरहँदा मृत्यु भएको अस्पतालले जनाएको छ ।
मृत्यु हुनेमा एघार जना चितवनका
हालसम्म चितवनमा उपचारको क्रममा १८ जना कोरोना सङ्क्रमितको मृत्यु भएको छ भने एक जना खैरहनीका वृद्धाको घरमै मृत्यु भएको छ । चितवनका ११ मृत्युमध्ये भरतपुर–११ एउटै वडाका चार जना परेका छन् । अन्य मृत्यु हुनेमा रत्ननगर र खैरहनीका छन् । मृत्यु हुनेमा सबैभन्दा बढी उमेरका १०१ वर्षकी वृद्धादेखि १८ वर्षकी किशोरीसम्म छन् ।
स्वास्थ्य कार्यालय चितवनका अनुसार हाल चितवन जिल्लामा २३० जना सङ्क्रमित होम आइसोलेसनमा छन् । १५६ जना निको भएर घर फर्केका छन् । ६९३ जना संस्थागत आइसोलेसनमा रहेका छन् । ५० जनाभन्दा बढीको आइसियूमा उपचार भइरहेको छ ।
भरतपुर अस्पतालका कोभिड–१९ उपचारका फोकल पर्सन डा. प्रमोद पौडेलले भरतपुर अस्पतालमा ८२ जना सङ्क्रमितको उपचार भइरहेको बताए । जसमा १० जना आइसियूमा रहेका छन् । हालसम्म भरतपुर अस्पतालबाट आइसियूमा रहेका १० जना सङ्क्रमित डिस्चार्ज भएका छन् ।
नौ जना बाहिरी जिल्लाका
चितवनमा उपचारको क्रममा मृत्यु हुनेमा ९ जना सङ्क्रमित चितवनबाहिरका हुन् । मृत्यु हुनेमा हेटौँडा उपमहानगरपालिकाका मात्रै ४ जना छन् । नवलपरासी, गोरखा, बारा, नवलपुर र कैलालीका एक–एक जना सङ्क्रमितको चितवनका विभिन्न अस्पतालमा उपचारको क्रममा मृत्यु भएको छ ।@चितवन पोस्ट
याशासी मिडिया हाउस प्रा.लि.
भरतपुर - १० चितवन ,नेपाल
ईमेल: [email protected]
कार्यालय फोन- +९७७-५६-६९५२५४, ९८४५०५५३६५
सूचना तथा प्रसारण बिभाग दर्ता नं. ३२३४-२०७८/७९
प्रतिक्रिया दिनुहोस