![](https://www.hellochitwanonline.com/wp-content/uploads/2024/08/WhatsApp-Image-2024-07-26-at-14.54.58_adbbdc7d.jpg)
चितवन, उपचुनावको मिति नजिकिँदै जाँदा चितवन चर्चामा छ । ३ निर्वाचान क्षेत्र रहेको चितवनमा २ नम्बर क्षेत्रमा उपचुनाव हुँदै छ । वैशाख १० गते हुने उपचुनावका कारण चितवन फेरि एकपटक चर्चामा छ । दल खोलेको ६ महिनामै राष्ट्रिय स्वतन्त्र पार्टीका सभापति रवि लामिछानेले सबैभन्दा बढी मतान्तरले जित हासिल गरेको चितवन–२ मा १० वैशाखमा हुने चुनावलाई महत्वका साथ हेरिएको छ । राष्ट्रिय स्वतन्त्र पार्टीका सभापति रवि लामिछाने फेरि चितवन–२ मा उम्मेदवार बन्नु र दुई ठूला दल नेकपा एमाले र नेपाली कांग्रेसले युवा उम्मेदवारलाई अगाडि सार्नुले चुनावी चर्चा बढेको हो ।
यसअघि ४ मंसिरमा भएको निर्वाचनमा एमाललेले कृष्णभक्त पोखरेल र नेपाली कांग्रेसले उमेश श्रेष्ठलाई उम्मेदवार बनाएको थियो । विगतमा लामिछानेलाई कमजोर आँकलन गरेका कारण दुई ठूला दलले आफ्नो तयारीमा समय खर्चिएका थिए । यसपटक लामिछानेलाई मुख्य प्रतिस्पर्धीका रूपमा लिएर एमाले र कांग्रेसले आफ्नो तयारीलाई अगाडि बढाएका छन् । यसअगाडि भएको निर्वाचनमा रवि लामिछाने जति आक्रमकरूपमा आगाडि थिए अहिले उनी रक्षात्मक अवस्थामा रहेका छन् । मंसिर ४ को चुनावी तयारीमा भएका कार्यक्रममा अथाहा प्रश्न गर्ने लमिछाने यसपटक जवाफ दिन व्यस्त भएका देखिन्छन् । चुनावी सभा तथा घरदैलो कार्यक्रममा सभापति लामिछानेको समय त्यही अडियो टेपको जवाफ दिँदै बितेको छ ।
पुनः चुनाव गराउँदा राज्यको ठूलो खर्च भएको विषयमा पनि मतदाताले रविलाई प्रश्न गरेका छन् । यसपटक रविले पहिलाजस्तो विकासको एजेन्डा मतदातासामु प्रस्तुत गर्न भ्याएका छैनन् । मतदाताको अडियो टेपको प्रश्न र नागरिकताको विषय’bout जवाफ दिँदैमा उनलाई ठिक्क छ । घरदैलो होस् या सार्वजानिक समारोह । प्रायः कार्यक्रममा रवि लामिछाने आफ्ना योजना र एजेन्डाभन्दा आफूमाथि उठेका प्रश्नको जवाफमा समय खर्च गरिरहेका छन् । राष्ट्रिय स्वतन्त्र पार्टीका सांसद् ढाकाकुमार श्रेष्ठले मेडिकल व्यवसायी दुर्गा प्रसाईंसँग २ करोड मागेको अडियो टेप सार्वजनिक भएपछि जवाफ दिनका लागि थप समय खर्च गर्नुपरिहेको छ ।
घरदैलोमा पुग्दा केही व्यक्तिसँग नोकझोक भएका भिडियोहरू पनि भाइरल भइरहेका छन् । रविलाई धेरै सोधिने प्रश्नमा, सरकारमा किन गएको ? प्रतिपक्षमा बसेर जनताका समस्या बोल्नुपर्ने होइन ? दोहोरो नागरिकता किन ? तपार्इंका कारणले दोस्रो निर्वाचन हँुदा राज्यलाई घाटा भएन र ? जता सत्ता उतै लचक किन ? राहदानीको विषय के हो ? फेरि निर्वाचन पो हुने हो कि ? यस्ता प्रश्नबीच रविले केही समय सहज जवाफ फर्काएको पाइए पनि कतिपय स्थानमा झर्कोफर्को गरेको देखिन्छ । यस अघिको निर्वाचनमा कोही कसैलाई गाली गर्ने नीति नभएको बताउने रविले यस निर्वाचनका क्रममा अरू दल र नेतालाई आलोचना गर्नेक्रमलाई बढाएका छन् । नेकपा एमाले र नेपाली कांग्रेसले युवा उम्मेदवारलाई अगाडि सारेपछि रवि थप रक्षात्मक बन्ने अवस्थामा पुगेका हुन् । कांग्रेसले पार्टीको जिल्ला सभापति भइसकेका युवा नेता जीतनारायण श्रेष्ठलाई उम्मेदवार बनाएको छ ।
यस अगाडि रविलाई राम्रो मत आएको क्षेत्र कालिका नगरपालिकामा स्थायी बसोबास गर्ने श्रेष्ठ यसपटक आफैं उम्मेदवार बनेका कारण कालिकाको मत फेरि रविलाई जान्छ भन्ने छैन । एमालेले पार्टी अध्यक्ष समेत रहेका युवा नेता रामप्रसाद न्यौपानेलाई उम्मेदवार बनाएको छ । भरतपुर महानगरपालिकाभित्र पर्ने वडामा राम्रो पकड भएका न्यौपानेले आफ्नो चुनावी अभियानलाई यस अघिभन्दा बढी मेहनत गरेर जनस्तरमा पुगको देखिन्छ । श्रेष्ठ र न्यौपाने युवा र स्थानीय भएका कारण प्रचारका क्रममा युवापुस्ता सक्रिय देखिएका छन् । कांग्रेस र एमालेले आफ्नो जनमतलाई जोगाउन मेहनत गरेका छन् भने रास्वपाले पनि आफ्नो जितलाई निरन्तरता दिनका लागि उतिकै मेहनत गरेको देखिन्छ । यस अगाडि अरू दलका कार्यकर्ता खुलेरै रविको पक्षमा देखिए पनि यसपटक धेरै खुलेका र बाहिर देखिएका छैनन् । रास्वपाले अघिल्लो चुनावभन्दा अझ मत बढाउने लक्ष्य लिएको बताउँदै विशेषगरी, सहरी क्षेत्रभन्दा ग्रामीण क्षेत्रमा घरदैलो कार्यक्रम बढी गरिएको बताइएको छ । अघिल्लोपटक सहरी क्षेत्रभन्दा ग्रामीण क्षेत्रमा रविको कम भोट आएको थियो ।
यता कांग्रेस एमालेले ग्रामीण क्षेत्रसँगै सहरी क्षेत्रमा बढी ध्यान दिएको छ । पहिला गुमेको सबै मत यसपटक फर्काउने दाबी कांग्रेस र एमालेले गरेका छन् । एकअर्कालाई प्रतिस्पर्धी बताइरहेका कांग्रेस र एमालेले विगतमा आफ्नो मत जोगाउन नसकेको बताउँछन् । विगतमा गुमेको मत सबै फिर्ता गरेर जित निकाल्ने बताउँदै एमालेका उम्मेदवार रामप्रसाद न्यौपाने आफू कुनै लेनदेन र विवादमा नफस्ने प्रतिबद्धता मतदातासामु गर्दै आएका छन् । नेपाली कांग्रेसका उमेदवार जीतनारायण श्रेष्ठले पनि चुनावी सभामा पुगेर फेरि पहिलाको हावाहुरी अब नआउने र कांग्रेसको जित हासिल हुने बताउँदै आएका छन् । विगतका कांग्रेसका विद्रोही नेताले श्रेष्ठलाई साथ दिएका छन् । ४ मंसिरको चुनावमा रविले ४९ हजार २६१ मत ल्याएका थिए भने । देशमै सबैभन्दा बढी ३४ हजार २८१ मतान्तरले जित निकालेका रविले फेरि पनि जित्ने दाबी गररहँदा नेकपा एमाले र नेपाली कांग्रेस सधैं एउटै परिणाम नआउने बताउँदै आएका छन् । कांग्रेसका उम्मेदवार उमेश श्रेष्ठले जम्मा १४ हजार ९८३ मत र एमालेका कृष्णभक्त पोखरेलले १४ हजार ६६७ मत प्राप्त गरेका थिए ।@राजधानी
याशासी मिडिया हाउस प्रा.लि.
भरतपुर - १० चितवन ,नेपाल
ईमेल: [email protected]
कार्यालय फोन- +९७७-५६-६९५२५४, ९८४५०५५३६५
सूचना तथा प्रसारण बिभाग दर्ता नं. ३२३४-२०७८/७९
प्रतिक्रिया दिनुहोस