![](https://www.hellochitwanonline.com/wp-content/uploads/2024/08/WhatsApp-Image-2024-07-26-at-14.54.58_adbbdc7d.jpg)
काठमाडौँ– संसद सचिवालयले कोरोना परिक्षण गरेका सांसदलाई मात्र बैठक कक्षमा प्रवेश गर्न दिने भएको छ।
शुक्रबार दिउँसो ४ बजेदेखि संसदको बजेट अधिवेशन सुरु हुने भएपछि बिहीबार सांसदहरुको पिसिआर प्रविधिबाट परीक्षण गर्न स्वाव संकलन भइरहेको छ।
परीक्षणको रिपोर्ट शुक्रबार बिहानसम्म आउने र सांसदहरुले परीक्षणको रिपोर्ट नेगेटिभ आए मात्र बैठक कक्षमा प्रवेश गर्न दिने तयारी गरिएको प्रतिनिधिसभाका सचिव गोपालनाथ योगीले जानकारी दिए।
बिहीबार संसद भवन नयाँ बानेश्वरमा काठमाडौँमा उपलब्ध भएका सांसद, कर्मचारी, सुरक्षाकर्मीको स्वाब संकलन गरिएको छ। छुटेका सांसदहरुलाई शुक्रबार बिहान ७ बजे उपस्थित हुन आग्रह गरिएको सचिव योगीले बताए।
परीक्षणको रिपोर्ट आउन सामान्यतया: ६ घण्टा लाग्ने भएकाले शुक्रबार नै स्वाब दिनेको पनि रिपोर्ट आउने र नेगेटिभ देखिएमा मात्र संसदमा प्रवेश दिइने भएको हो। जिल्ला जिल्ला पुगेका सांसद काठमाडौँ फर्किने क्रम जारी रहेको छ। त्यसरी आउने सांसदको परीक्षण भई रिपोर्ट नेगटिभ आए मात्र बैठकमा बस्न पाउनेछन्।
बिहीबार सभामुख अग्निप्रसाद सापकोटा, राष्ट्रियसभा अध्यक्ष गणेशप्रसाद तिमिल्सिना, पूर्वप्रधानमन्त्रीहरु शेरबहादुर देउवा, माधवकुमार नेपालले स्वाब दिएका छन्।
त्यस्तै मन्त्री र सांसदहरुले पनि स्वाब दिएका छन्। जिल्ला जिल्ला पुगेका सांसद भर्खरै मात्र काठमाडौँ फर्किएको हुँदा विश्वस्वास्थ्य संगठन र स्वास्थ्य मन्त्रालयको मापदण्डअनुसार परीक्षणपछि मात्रै बैठकभित्र प्रवेश गराउन लागिएको हो।
सभामुख अग्निप्रसाद सापकोटाका प्रेस सल्लाहाकार श्रीधर न्यौपानेका अनुसार बिहीबार चार सय ३१ जनाको स्वाब संकलन भएको छ। यसमध्ये एक सय ७५ जना प्रतिनिधिसभाका सांसद छन् भने राष्ट्रियसभाका ५९ मध्ये सबै जसोले स्वाब दिएका छन्। संसदका अधिकांश कर्मचारी र सुरक्षाकर्मीको पनि स्वाब संकलन भएको छ।
सचिवालयले प्रत्येक दुईवटा कुर्सी खाली राखेर सांसदहरुलाई राख्ने भएको छ। प्रधानमन्त्री केपी शर्मा ओलीका लागि पहिलो सिटमा एक्लै राख्ने र त्यसपछिको एउटा लाइन खाली राखेर मात्र अरु सांसदलाई बस्न दिने तयारी गरिएको छ।
संसदमा प्रधानमन्त्री बस्ने कुर्सी, बैठक कक्ष, कार्यकक्षको अवस्थाबारे बुधबार उनको निजी चिकित्सक दिव्या सिंह, स्वास्थ्य मन्त्रालय र संसद सचिवालको स्वास्थ्य टोलीले निरीक्षण गरेको थियो।
चिकित्सकको टोलीले प्रधानमन्त्रीको कार्यकक्षमा ६ जनाभन्दा बढी जम्मा नहुन, संसदमा एसी नचलाउन, सेनिटाइज गर्न, संसद छिर्ने गेटमा हात धुन साबुन पानी राख्न, अनिवार्य, ज्वरो परीक्षण गर्न सुझाव दिएको छ।
संयुक्त बैठक बस्ने अवस्थामा प्रतिनिसभाको हलमा मात्र सांसद नअट्ने हुँदा ग्यालरीमा समेत राखिने छ।
याशासी मिडिया हाउस प्रा.लि.
भरतपुर - १० चितवन ,नेपाल
ईमेल: [email protected]
कार्यालय फोन- +९७७-५६-६९५२५४, ९८४५०५५३६५
सूचना तथा प्रसारण बिभाग दर्ता नं. ३२३४-२०७८/७९
प्रतिक्रिया दिनुहोस