![](https://www.hellochitwanonline.com/wp-content/uploads/2024/08/WhatsApp-Image-2024-07-26-at-14.54.58_adbbdc7d.jpg)
काठमाडौं : नेकपा वरिष्ठ नेता माधवकुमार नेपालले आफू पार्टीको तेस्रो अध्यक्ष नबन्ने बताएका छन् । नेपालले बिहीबार साँझ प्रधानमन्त्री केपी ओलीलाई भेटेरै आफू तेस्रो अध्यक्ष नबन्ने जानकारी गराएका हुन् ।
प्रधानमन्त्री ओलीले बुधबार पार्टी सचिवालय बैठकमा नेता नेपाललाई विधान संशोधन गरेर तेस्रो अध्यक्ष र उपाध्यक्ष वामदेव गौतमलाई संसद्मा ल्याएर कोरोना संकट टरेपछि प्रधानमन्त्री बनाउने प्रस्ताव गरेका थिए ।
‘म तपार्इंले प्रस्ताव गरेको तेस्रो अध्यक्ष हुन्नँ । त्यसमा मेरो सहमति हुँदैन । मेरो कुरा त तपाईं पार्टी र सरकार सञ्चालनमा असफल हुनुभयो, राम्रोसँग चलाउन सक्नुभएन, तपाईंले पार्टी र सरकार दुवै मोर्चाको नेतृत्व छाड्नुपर्छ भन्ने हो’, नेता नेपालले प्रधानमन्त्रीलाई भनेको उद्धृत गर्दै उनीनिकट एक स्थायी समिति सदस्यले भने ।
दाहालसँग टेलिफोनमा कुराकानी गरेर नेपाल बालुवाटार गएका थिए । प्रधानमन्त्री निवासबाट बोलावट भएपछि उनले दाहाललाई त्यसबारे जानकारी गराएका हुन् । ओलीले नेपाललाई संवैधानिक निकायहरूमा नियुक्तिका लागि छलफल गर्न भन्दै बोलाएका थिए ।
पार्टीभित्र सचिवालय, स्थायी समितिदेखि केन्द्रीय समितिसम्ममा आफू अल्पमतमा परेपछि ओलीले नेपाललाई फकाउन प्रयास गर्दै आएका थिए । उनले महाधिवेशन छिटो गरेर पार्टी अध्यक्षमा नेपाललाई सघाउने, संघीय सरकारका मन्त्रीहरूदेखि आफ्नो निजी सचिवालय हेरफेर गर्ने, संवैधानिक निकायहरूमा सहमतिका आधारमा नियुक्ति गर्ने र प्रदेशका मुख्यमन्त्रीहरूसम्म पनि फेर्ने प्रस्ताव गरेका थिए ।
त्यो प्रस्ताव स्वीकार नगरेपछि बुधबारको सचिवालय बैठकमा ओलीले पार्टीमा तेस्रो अध्यक्ष राख्ने र त्यसमा नेपाललाई प्रस्ताव गरेका थिए । बिहीबार साँझ ओलीसँगको भेटमा अडानमा कायमै रहेको र कुनै पदीय भागबन्डामा नलत्रिने जवाफ दिएर उनी फर्केको एक स्थायी समिति सदस्यले बताए ।
याशासी मिडिया हाउस प्रा.लि.
भरतपुर - १० चितवन ,नेपाल
ईमेल: [email protected]
कार्यालय फोन- +९७७-५६-६९५२५४, ९८४५०५५३६५
सूचना तथा प्रसारण बिभाग दर्ता नं. ३२३४-२०७८/७९
प्रतिक्रिया दिनुहोस